Нæ театрмæ кæсгæйæ

29 марта 2012 Культура [версия для печати] [читать комментарии] [размер шрифта: a- | А+] [6503 просмотра]

Нæ театрмæ кæсгæйæ Хетæгкаты Къостайы номыл Хуссар Ирыстоны паддзахадон театр йæ сырæзтæй фæстæмæ иузæрдион æмæ цæстуарзонæй лæггад кæны ирон адæмæн. Театр афтæ адджын фæцис адæмæн æмæ-иу театрмæ спектаклмæ ацæуыны фадат кæмæн нæ фæцис, уыдон дæр-иу фæзуаты лæууыдысты æмæ, куыд уаз бынат, афтæ æхцондзинад истой театры агъуыстмæ хæстæгдæр кæй сты, уымæй дæр. Уымæн æмæ театр кæддæриддæр æвдыста дуг æмæ царды хабæрттæ.
Марты 27-æм бон Театры дунеон бон кæй уыд, уый тыххæй нæ бафæндыд адæмы уарзон театрыл æрныхас кæнын, нæ республикæйы адæм куыд хъуыды кæнынц йæ арæзтады тыххæй æмæ сæ царды цавæр бынат ахсы, стæй йын йæ сомбон куыд уынынц. Уый тыххæй нæ газеты уацхæссæг ауагъта бафарст æмæ уын уæ размæ хæссæм уыдонæй цалдæры дзуаппытæ.


Хъазиты Мелитон, фысджыты цæдисы сæрдар:


1 Кæйдæр уæзгуытыл мæсгуытæ суадзæн æмæ цард скъоборгæнæн куыд нæ ис, афтæ искæй хæдзары искæй æмбырдгæнæн залы национ театртæ аразын удмарæн хабар у. Æмæ уыцы хъуыддаджы раст нæ уаид театры артисттæм кæнæ сæ къухдариуæггæнджытæм стыр азымтæ хæссын. Мæнгæй нæ акæнынц: дæ уат куыд у, дæ къæхтæ афтæ адаргъ кæн, зæгъгæ.
 Фæлæ фидæн абонæй аразгæ у. Нæ театрæн йæ бон куыд у, афтæ йæ хъæуы йæ уæнгтæ айтынг кæнын. Иу ран бадынæй адæймаг дæр, аивад дæр æндзыг кæнынц. Цы фесафай, уый та фæстæмæ здахын нал фæкомы.
2 Театры агъуыст аразгæ нæ кæнынц. Цыма нын не стыр фыдтæ фаг не сты - театры агъуыст саразыны 'фсон кæйдæр сæры дæлимонтæ сæ дæлгоммæ фæндтæ æххæст кæнынц. Уыцы сыгъд къултæ куыд фефсæрдзысты уæззау æмбæрзты бын, уый хæйрæджытæ сæхæдæг дæр нæ зонынц. Рæстæгыл куынæ фæцырд уæм театр, куыд æмбæлы, афтæ арæзт куынæ æрцæуа, уæд нæм дзы аивады бæсты фыдбылыз кæсы.
3 Театр театр хъуамæ уа. Театрæй хъæууон хиирхæфсæн къорд аразын раст хъуыды нæу. Ис нæм ансамблтæ. Уыдон кафæнт æмæ зарæнт. Театры хæс стырдæр æмæ бæрнондæр у.


Гуыцмæзты Ельзæ, Хетæгкаты Къостайы номыл Паддзахадон драмон театры директор:


- Æз мæ царды фылдæр бонтæ æрвитын театры. Мæн театры директорæй куы снысан кодтой, уæдæй фæстæмæ бæстонæй æрæвнæлдтон, цæмæй нæ театр скуса. Куыд зонæм, афтæмæй, театр 1990 азтæй фæстæмæ бирæ цæлхдурты сæрты рахызт, фæлæ абон йæ куыст дарддæр кæны. Стыр тыхтæ бахардз кодтам, цæмæй театрæн йæ куыст ма æрнымæг уыдаид. Уымæн æмæ йын ис стыр нысаниуæг нæ адæмы царды. Зæгъæм, актер бирæ рæстæг сценæмæ куы нæ рахиза, уæд ын уый фæстæ зын вæййы йæ куысты. Хорз æй хъуыды кæнын, театры зал-иу адæмæй йедзаг кæй уыдис. Бирæтæ-иу дзы кодтой лæугæ дæр. Фæлæ уый фæстæ 2005 азы нæ театр басыгъд æмæ, кæй зæгъын æй хъæуы, нæ адæм фæиппæрд сты театры цардæй бирæ рæстæг. 2009 азы та æрæвнæлдтам нæ куыстмæ æмæ иу азы æмгъуыдмæ сæвæрдтам фондз спектаклы. Афтæ зæгъæн ис, æмæ кæй уыдысты бæрзонд æмвæзадыл арæзт. Абон мах фылдæр сценæйыл æвдисæм концертон программæтæ. Театр филармони нæу. Мæн фæнды, цæмæй фылдæр нæ хъусдард здахæм классикæмæ. Нæ театры куыст нын къуылымпы кæны, режиссертæ нын кæй нæй, уый. Фарон нæ юбилей куы уыдис, уæд нын рахицæн кодтой æхцайы фæрæзтæ æмæ уыдонæй ныууагътам иу милуан сомы, цæмæй нæ тетрмæ фæхонæм, йæ куыст хорз чи зоны, ахæм режиссерты. Мах ныфс ис, нæ театр кæй араздзæн стыр размæцыды къахдзæфтæ. Æз афтæ хъуыды кæнын, æмæ мах ныртæккæ комедиты руаджы фæфылдæр кæндзыстæм не сценæмæкæсджыты…
Мæнæн абон мæ зæрдæ тынг риссы нæ театры арæзтадыл, иу хъуыдымæ кæй нæ цæуынц æмæ йын кæрон кæй нæй. Арæзт ын æрцыд цалдæр проекты. Мæнæн фыццаг дæр фæцыд мæ зæрдæмæ, кæцы хъуамæ сарæзтаид горæт Мæскуыйы раздæры мэр Ю. Лужков. Кæдæм кæсынц нæ интеллигенци, кæцытæ хорз зонынц, нæ театры агъуыст цæмæ æрхаудта, уый? Уæрæсейы Федераци цы æхцайы фæрæзтæ рахицæн кодта, уыдон бахардз сты, театрæн чи нæ хъуыдис, фæлæ кæй сарæзтой ахæм проекттыл. Æмæ уыдæттæн дзуаппдæттæг нæй. Цæмæннæ ис гæнæн æмæ адæмæн, махæн дæр мыхуыргонд æрцæуа театры проект? Мæн, зæгъæм, фæнды уыцы проектимæ базонгæ уон, уый, кæд ын ис, уæд. Уымæн æмæ уым кусдзыстæм мах æмæ нæ фæнды уымæн саргъ кæнын. Бамбарæм иу хъуыддаг - театр у кульутрæйы артдзæст æмæ хъуамæ арæзт æрцæуа бæрзонд æмвæзадыл.


Бибылты Сослан, драмтеатры аивадон къухдариуæггæнæг, Республикæ Хуссар Ирыстоны сгуыхт артист:


- 27-æм марты уыдис нæ бæрæгбон - Театры дунеон бон. Цыдæриддæр театртæ ис, уыдон иууылдæр нысан кодтой сæ профессионалон бæрæгбон. Кæй зæгъын æй хъæуы, уый æрмæст театры чи кусы, уыдон бæрæгбон нæу, фæлæ театрдзауты, æмткæй сисгæйæ, адæмы бæрæгбон дæр. Æмæ сын арфæ кæнын. Бузныг, театрæн табу чи кæны æмæ йæ æгæрон уарзтæй чи уарзы, æппæт уыдонæн. Нæ театр ис æвзæр уавæры. Нæу нæ уавæр бæллиццаг. Бирæ хатт æй зæгъæм, абон не сценæ нырыккон домæнтæн дзуапп кæй нæ дæтты, уый. Æмæ нæм цы фантазитæ райгуыры, уыдон нæ бон нæ вæййы сæххæст кæнын. Нæ театры артисттæ никæцы театрты артисттæй къаддæр сты. Арæх вæййæм гастролты æмæ уæд фенæм æндæр театрты артистты хъазт дæр. Фæстаг хатт уыдыстæм Ярославлы æмæ уым равдыстам Лопе де Вегайы пьесæмæ гæсгæ арæзт спектакль «Иуæндæсæм фæдзæхст». Уыдон нын уыдысты тынг æнтыстджын гастролтæ. Федтам, актеры дæсныйадæй нæ кæй не 'мбулынц, фæлæ се сценæйон, техникон æмæ спецэффекты фæрæзты руаджы. Æмæ сæм, кæй зæгъын æй хъæуы, бирæ хатт хæлæг дæр фæкæнæм, ахæм сценæтыл кæй архайынц, уый тыххæй.
Ныртæккæ не скаст у театры бæстыхайы арæз-тадмæ, æмæ мах нæ ныхас загътам фидарæй, цæмæй, ныртæккæ театр аразынмæ куыд хъавынц, уый ма æрцæуа. Уымæн æмæ йæ къултæ нал бæззынц, басыгъдысты. Мах æрсидтыстæм Хуссар Ирыстоны адæммæ, нæ Парламентмæ, Хицауадмæ, ацы хъуыддагыл разы кæй не стæм, уый фæдыл. Театры арæзтад у цæргæ-цæрæнбонты хъуыддаг æмæ йæ хъæуы саразын ногæй, хорз проектыл. Ацы ран хъуамæ адæм дæр фидарæй зæгъиккой сæ ныхас, уымæн æмæ театр тынг æнгом баст у адæмимæ. У лæгдзинады, стæй ирон æвзаджы скъола дæр. Уый хъуамæ дзура рæстдзинад, хъуамæ адæмæн амона фæндаг амондмæ, рæсугъддзинадмæ. Хъомыладон куысты стыр ахсджиаг бынат ахсы театр, уымæн æмæ уым æвдыст цæуынц нæ традицитæ æмæ нæ культурæ. Кæд нын саразой театр, уæд мæнæн мæ хъуыдыйы ис театралон музей саразын. Театрæн кæддæриддæр вæййы йæхи рагон æрмæджытæ æмæ рауаид цымыдисон. Ныфс нæ ис, кæй нын сараздзысты театр æмæ та нæ рæсугъд аивадæй кæй рухс кæндзыстæм адæмы зæрдæтæ.


Фыссæг Наниты Асиат:


- Нæ театрæн йæ дæргъвæтин сфæлдыстадон фæндагыл ис хъæздыг æмæ бирæвæрсыг истори… Стыр æнтыстытæ…
Фæлæ абон нæ театрыл цыгъуызы ис дзурæн, уый нæ зонын… Акæсæм-ма, цы уавæрты кусынц нæ театры коллектив, фæлæ уæддæр сæ цæрæнбон бирæ, сæ удтæй арт цæгъдынц æмæ сын уый тыххæй хъæуы бузныг зæгъын.
Нæ театры сомбон бæллиццаг кæй уыдзæн, ууыл æз дызæрдыг нæ кæнын. Ныр амæй фæстæмæ нæ хъуыддæгтæ хъуамæ цæуой нæ уды фæндиаг хорз, уыдонимæ нæ театры куыст дæр. Рæхджы йæ къахыл слæудзæн æмæ та театрдзаутæн сæ зæрдæтæм рухсы цъыртт кæд бакæлид…
Театры агъуъыст куы басыгъд, уыцы райсом куыстмæ фæцæйцыдтæн, æмæ мыл адæмæй чи æмбæлд, уыдоны уындæй мæ зæрдæ уынгæг кодта. Кæрæдзийæн мæсæллæй кодтой, сылгоймæгтæй чидæртæ куыдтой, куыдтой сæ уарзон театры агъуысты басыгъдыл... Фæлæ... уыцы агъуыст абонмæ цы уавæры уыд, уый куыд быхстам?
Абон дæр мæ хъус лæмбынæг дарын нæ театры архайдмæ. Сæ ног спектаклтæм сын, уавæрмæ гæсгæ, цæуын æмæ сын сæ арæхстдзинадыл цин кæнын. Уыимæ мæ сæр ныллæг къул кæнын сæ разы, фæстаг 20 азы дæргъы театры зынг бамынæг кæнын чи нæ бауагъта æмæ абоны бон дæр, æнæнормалон уавæрты кусгæйæ, сценæмæкæсджыты зæрдæтæ кæй рухс кæнынц, уый тыххæй.


Тадтаты Фатимæ, РХИ-йы адæмон артисткæ:


- Мæнæн, раст куы зæгъон, уæд театр ссис мæ дыккаг хæдзар. Уымæн æмæ мæ царды, афтæ зæгъæн ис, фылдæр рæстæг æрвитын ам - театры. Уый у мæ професси æмæ, сæйраджыдæр та - мæ куыст. Мæнæн мæ зæрдæ тынг риссы нæ театры раздæры агъуыстыл. Уый басыгъд цалдæр азы размæ æмæ йын йæ фæстиуджытæм уæлæнгай цæстæй нæ хъæуы кæсын. Алы ныхæстæ дæр цæуы, аразджытæ йæ сæхæдæг дæр дзурынц æмæ стæй æнæуый дæр, нæхæдæг дæр куыннæ æмбарæм, театры агъуыст афтæмæй дарддæр сæнди-дзын кæнынæн гæнæн кæй нал ис. Театр цы рæстæджы арæзт æрцыд, уый алчидæр, æвæццæгæн, зоны. Раздæр уыцы рæстæджы пайда кодтой чъыр æмæ змисæй. Уыцы чъыр басыгъд æмæ агъуысты къултæн тых нал ис. Саразæн сын нал ис. 2007 азы йын экспертизæ арæзт æрцыд æмæ эксперттæ загътой, ацы агъуыстæй ног театр саразын кæй нæй гæнæн. Æмæ кæд гæнæн ис, уæд æй æруромын хъæуы, науæд хорзæн нæ фæуыдзæнис. Махæн, театры кусджытæн, иууылдæр нæ зæрдæтæ риссынц ацы хъуыддагыл. Адæм дæр нæ фарсмæ сты æмæ нын фæзæгъынц, зæгъгæ, рацæут æмæ йæ ныхмæ митингтæ саразут æмæ адæм дæр уæ фарсмæ æрбалæудзысты. Бирæ театрдзаутæ нæ уарзынц, не сты ахуыр, абон кæм стæм, уыцы агъуыстмæ цæуын, уымæн æмæ сын йæ раздæры бынат бирæ уарзондæр у æмæ фæзæгъынц, нæ театр, зæгъгæ, куы сырæза, уæд та уæм æнæмæнгæй цæудзыстæм. Кæй зæгъын æй хъæуы, уымæн дæр ис стыр нысаниуæг. Фæнды мæ, цæмæй нæ хицауады разына ахæм адæймæгтæ, кæцытæ сæрмагондæй æркæсой нæ театры сомбоны хъуыддагмæ.


Цхуырбаты Ларисæ

 

"Хурзаерин"

Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Информация

Посетители, находящиеся в группе Гости, не могут оставлять комментарии к данной публикации.
Солнечный

мойка

Экстренные службы

  • 112 – МЧС РЮО
  • 101 – Пожарная служба
  • 102 – Милиция
  • 103 – Скорая мед. помощь
  • 104 – Аварийная служба газа
  • 105 – Водоканал
  • 806 5030 – Защита прав потребителей
  • 805 47 71 – Вывоз строительного и бытового мусора
ЮОГУ

Цитаты

Деньги не портят человека, они просто показывают, кто он есть на самом деле.
Производство сайтов

Новости

«    Февраль 2019    »
ПнВтСрЧтПтСбВс
 123
45678910
11121314151617
18192021222324
25262728 
Продается цех по производству пластиковых окон с оборудованием, общей площадью 600 квадратов. Цех находится по адресу: ул.Сталина 102, (городское озеро).Тел. 8929 810 02 07
Солнечный

Энергоресур

Объявления

Перевозки посылок Цхинвал-Москва-Цхинвал Выезд из Цхинвала: 1 числа. Прибытие в Москву: 3-4 числа. Выезд из Москвы: 5го утром. Доставка заказов из интернет-магазинов. Mercedes Sprinter. Максимальная длина товара: 4,4 м 1 кг –от 50руб Стаж перевозок по данному маршруту 2.5 года Тел.: +7(928) 857-55-50, +7(929) 8045531 Спросить Вову
***

Радио ОНЛАЙН!

Радио ОНЛАЙН!